Cicero, Epistula ad Octavianum (XML Header) [genre: prose; letters] [word count] [lemma count] [Cic. Oct.]. | ||
<<Cic. Oct. 6 | Cic. Oct. 9 (English) | >>Cic. Oct. 9 |
8
Itaque si quid illae maiorum nostrorum sepultae reliquiae sapiunt , si non una cum corpore sensus omnis uno atque eodem consumptus est igni , quid illis interrogantibus quid agat nunc populus Romanus respondebit aliquis nostrum qui proximus in illam aeternam domum discesserit ? aut quem accipient de suis posteris nuntium illi veteres Africani , Maximi , Pauli , Scipiones ? quid de sua patria audient quam spoliis triumphisque decorarunt ? an esse quendam annos xviii natum , cuius avus fuerit argentarius , adstipulator pater , uterque vero precarium quaestum fecerit , sed alter usque ad senectutem ut non negaret , alter a pueritia ut non posset non confiteri ; eum agere rapere rem publicam , cui nulla virtus , nullae bello subactae et ad imperium adiunctae provinciae , nulla dignitas maiorum conciliasset eam potentiam , sed forma per dedecus pecuniam et nomen nobile consceleratum impudicitia dedisset , veteres vulneribus et aetate confectosIulianos gladiatores , egentis reliquias Caesaris ludi , ad rudem compulisset , quibus ille saeptus omnia misceret , nullis parceret , sibi viveret , qui tamquam in dotali matrimonio rem publicam testamento legatam sibi obtineret ?
Audient duo Decii servire eos civis qui ut hostibus imperarent victoriae se devoverunt ; audiet C . Marius impudico domino parere nos , qui ne militem quidem habere voluit nisi pudicum ; audiet Brutus eum populum quem ipse primo , post progenies eius a regibus liberavit , pro turpi stupro datum in servitutem . Quae quidem si nullo alio , me tamen internuntio celeriter ad illos deferentur ; nam si vivus ista subterfugere non potero , una cum istis vitam simul fugere decrevi .
9
Cicero, Epistula ad Octavianum (XML Header) [genre: prose; letters] [word count] [lemma count] [Cic. Oct.]. | ||
<<Cic. Oct. 6 | Cic. Oct. 9 (English) | >>Cic. Oct. 9 |